Fillesë në të ardhmen profesionale

Teknikat e gatimit dhe planifikimi i menysë për darkë

Fabian Kodra është kthyer para pak kohësh nga Gjermania në Shqipëri. Në Gjermani ai ka studiuar informatikë ekonomike dhe njëkohësisht ka punuar në një restorant. „Tani kjo gjë natyrisht më ndihmon shumë“, thotë ai. Në Shqipëri Fabiani i vijon studimet në Universitetin „Epoka“. Në trajnim ai dëshiron para së gjithash të grumbullojë përvojë të mëtejshme praktike. „Në universitetin tim 60% e tematikës ka të bëjë me ekonominë, kurse 40% me IT-në dhe programimin. Shumë punë mendore. Krejt ndryshe këtu unë mund të ndihmoj në mënyrë praktike. Përveç kësaj në të ardhmen do të dëshiroja të punoja në degën e turizmit“, na thotë Kodra rrugës për në kuzhinën e hotelit. Atje do të trajtohen sot pasdite sipas programit teknikat e gatimit. Nëse bëhet fjalë për pjekjen pikante të mishit me zjarr të fortë, karamelizimin e një ëmbëlsire ose planifikimin e menysë për darkë, grupi i punës në kuzhinë u përgjigjet të gjitha pyetjeve të pjesëmarrësve. Duke mbajtur parasysh rregullat e higjienës dhe të distancës, të rinjtë kanë të drejtë të provojnë edhe vetë të gatuajnë diçka.

Nga trajnimi direkt në punësim

Disa prej tyre sjellin me vete përvojën që kanë pasur në punësimin e tyre të parë, të tjerë sapo kanë përfunduar shkollën. Kështu edhe Endri Plaku. 19-vjeçari studion prej pak kohësh për menaxhim turizmi në Universitetin “Aleksandër Mojsiu” në Durrës.

Programi i trajnimit qe për të një shans i papritur: Punonjëset dhe punonjësit e grupit hotelier “Harmonia” e zbuluan shumë shpejt talentin dhe entuziazmin e tij. Tani, dy ditë para përfundimit të trajnimit ata i ofrojnë Endrit një vend pune. “Kjo gjë më gëzon jashtëzakonisht”, thotë Plaku. “ Këto katër javë i kalova me shumë kënaqësi dhe mësova shumë.” Ai e di tashmë edhe në cilën fushë të turizmit do të punojë në të ardhmen: “ Mediat sociale do të marrin një rëndësi akoma më të madhe për degën e turizmit. Në të ardhmen unë e shoh veten si menaxher për mediat sociale dhe marketingun.”

Grupi organizator i trajnimit gëzohet bashkë me Plakun. “Është shumë bukur të shikosh se si e shfrytëzojnë pjesëmarrësit arsimimin”, thotë Halisa Duka, këshilltare në DIMAK.
“Kualifikimet tona në sektorin e turizmit qenë për të gjithë një fillim i ri. Falë arsimimit profesional këtu në hotel, pjesëmarrësit tashmë janë bërë punonjës të kualifikuar. Më shumë se gjysma e pjesëmarrëseve dhe pjesëmarrësve që kanë qenë të pranishëm në trajnimin e bërë aktualisht në hotelin “Albanian Star” në Durrës, është punësuar ndërkohë në sektorin e turizmit. Përveçse në Durrës trajnimet ofrohen edhe në dy hotele të tjerë në Tiranë dhe Shkodër. Deri tani nga kjo ofertë kanë mundur të përfitojnë gjithsej pikërisht 115 gra dhe burra.

Pandemia e vështirëson karrierën profesionale

Me gjithë gëzimin për suksesin e arritur: pasojat e pandemisë së koronës nuk kanë prekur vetëm hotelin në Durrës dhe kushtet e trajnimit aty, por në tërësi edhe tregun e punës në Shqipëri. Në mënyrë të theksuar këto pasoja kanë prekur të rinjtë. Ofertat për kualifikime janë shtyrë, vende punësimi të planifikuara janë anuluar. Pothuajse të gjithë pjesëmarrësit në trajnim thonë që pandemia ka ndikuar negativisht në shanset e tyre për punësim.

Me gjithë situatën sfiduese oferta është e rëndësishme për të gjithë pjesëmarrësit , thotë Halisa Duka. “Si këshilltare pranë DIMAK-ut për mua është vendimtare të jem në kontakt të ngushtë me njerëzit, qoftë ballë për ballë, qoftë virtualisht. Ne përpiqemi që të mbetemi në kontakt me ta edhe gjatë kohës së pandemisë dhe t’u japim atyre përkrahjen e nevojshme.”

Certifikata që pjesëmarrëset dhe pjesëmarrësit marrin në fund të trajnimit është një hap i rëndësishëm në rrugën e tyre drejt sektorit të turizmit. Për katër javë ata jo vetëm që janë kualifikuar më tej nga ana praktike, por kanë fituar edhe përvojë të re, e cila do t’u ndihmojë të stabilizohen në tregun shqiptar të punës.

Botuar më: 09/2020