KOS | Këshillim i përshtatshëm psikosocial për këdo

Këshillim i përshtatshëm psikosocial për këdo

Falas dhe në mirëbesim: këshillim psikosocial tek DIMAK-u.

Këshillim i përshtatshëm psikosocial për këdo

DIMAK-u në Prishtinë ofron përkrahje psikosociale për personat e kthyer si dhe për popullsinë në vend. Për këtë temë keni më shumë informacione këtu.

Çfarë lloj përkrahjeje psikosociale ofron DIMAK-u dhe për kë?

Ekspertet dhe ekspertët e DIMAK-ut i këshillojnë personat e kthyer dhe popullsinë lokale lidhur me ndryshimet në jetën e tyre ose me një ristartim në Kosovë. Këshilltaret dhe këshilltarët e dinë se sa e vështirë është për disa nga personat e kthyer që të ambientohen përsëri në atdheun e tyre. Shumë prej tyre kanë probleme familjare ose shqetësime financiare. Edhe fëmijët shpesh e kanë të vështirë të mësohen nëpër shkolla dhe kopshte. Grupi i punës së DIMAKU-t i përkrah njerëzit me oferta ndërmjetësuese, këshillim psikosocial dhe oferta lidhur me përkrahjen profesionale. Personat e kthyer mund ta përfitojnë këshillimin psikosocial si bisedë individuale ose për të gjithë familjen. Temat e bisedave zhvillohen natyrisht në mirëbesim.

Është këshillimi psikosocial me pagesë?

Të gjitha shërbimet e ofruara nga DIMAK-u janë falas. Sipas nevojave këshilltaret dhe këshilltarët i ndërmjetësojnë njerëzit më tej tek institucionet kosovare, të cilat ofrojnë një shoqërim më të gjatë terapeutik. Në këto raste DIMAK-u bën kujdes, që organizatat përkatëse ta ofrojnë këshillimin e tyre gjithashtu falas.

Sa kohë zgjat përkujdesja psikosociale dhe si zhvillohet ajo?

Kohëzgjatjet janë krejt të ndryshme – sipas rastit konkret ato zgjasin nga disa javë deri në gjashtë muaj. Po ashtu edhe kohëzgjatja dhe denduria e bisedave janë të ndryshme. Përndryshe zhvillimi i tyre është i ngjashëm. Njerëzit tregojnë fillimisht për përvojat dhe ndjenjat e tyre. Në takimin e parë këshilltaret dhe këshilltarët përqendrohen tek rrethanat jetësore të personit. Shpesh bëhen këto pyetje: Çfarë keni përjetuar para dhe pas kthimit? Ka diçka, që e përkeqëson situatën tuaj? Cilat janë sfidat tuaja personale më të mëdha? Mbi bazën e përgjigjeve këshilltaret dhe këshilltarët përftojnë një mendim të përgjithshëm. Në këtë mënyrë ata mund t’u ofrojnë këtyre personave përkrahjen më të mirë të mundshme. Në më të shumtën e herëve bisedat zhvillohen një deri dy herë në javë, varësisht nga gjendja shpirtërore e njerëzve.

Ky tekst është shkruar në një gjuhë të thjeshtë. Qëllimi ynë është që ai të jetë i kuptueshëm mirë për të gjithë të interesuarit.

Botuar më: 03/2023