„DIMAK-u është ndërkohë një emër i njohur“

„Qendra Gjermane e Informacionit për Migracion, Aftësim Profesional dhe Karrierë“ (Deutsche Informationszentrum für Migration, Ausbildung und Karriere, DIMAK) ka krijuar shumë besim në gati katër vitet e ekzistencës së saj në Shqipëri. Kjo gjë çmohet më së miri gjatë kohës së krizës, thonë këshilltaret Halisa Duka dhe Dorisa Lala.

Zonja Duka, zonja Lala, si funksionon DIMAK-u në Shqipëri normalisht?
Dorisa Lala (DL): DIMAK-u përkrah në kuadrin e programit „Perspektiva Atdheu“ (Perspektive Heimat) personat që janë kthyer – kryesisht nga Gjermania – lidhur me riintegrimin e tyre profesional dhe shoqëror. Por ofertat tona për këshillim mund të shfrytëzohen edhe nga popullsia lokale në vend. Normalisht ne këshillojmë për mundësitë individuale gjatë bisedave personale për të krijuar në këtë mënyrë besim tek personat që këshillojmë.

Në ç’drejtim ka ndryshuar puna juaj gjatë pandemisë së Covid-19?
Halisa Duka (HD): Përkohësisht DIMAK-u është i mbyllur. Për këtë arsye ne mbështetemi në këshillimet dhe shërbimet që mund të ofrojmë jashtë Qendrës. Në këtë fazë ne ofrojmë aktivitete online dhe kualifikime dixhitale. Bisedat këshilluese momentalisht i ofrojmë në telefon, me skype ose me email. Ne vazhdojmë të jemi në kontakt të rregullt me njerëzit që këshillojmë dhe duam të jemi të sigurtë që ata janë mirë edhe në këtë kohë të vështirë. I rëndësishëm është dhe këshillimi psikosocial. Shumë njerëz kanë humbur punën dhe kanë nevojë për orientim. Përveç kësaj në punën tonë ne fokusojmë dhe temat me karakter gjinor (gender). DIMAK-u u ndihmon veçanërisht grave që të kapërcejnë nga ana profesionale, shoqërore dhe psiqike kohën e vështirë të pandemisë.

Botuar më: 06/2020

Dorisa Lala është këshilltare pranë DIMAK-ut në Shqipëri.

A kanë ndryshuar dëshirat e njerëzve që marrin pjesë në programet tuaja gjatë kohës së krizës së koronës?
HD: Në situatën aktuale njerëzit kanë shpesh dhe në mënyrë më të theksuar pyetje lidhur me informacione praktike, për shembull se kur do të ofrojnë përsëri këshillimin direkt partnerët tanë, siç është rasti i Zyrave të Punës.

Besimi është i rëndësishëm për një bashkëpunim të mirë. Si mund të krijohet besimi në rastin e mungesës së kontaktit direkt?
HD: Puna jonë në të vërtetë e ka bazën tek sinqeriteti dhe besueshmëria. Në këtë mënyrë DIMAK-u ka krijuar shumë besim gjatë viteve të kaluara. Ne përpiqemi të jemi gjithmonë të vëmendshëm për njerëzit dhe t’i përkrahim ata hap pas hapi me informacione të sigurta. Kjo gjë çmohet tani në këtë kohë.

DL: Unë mendoj që DIMAK-u ndërkohë është një emër i njohur. Njerëzit e dinë se çfarë i pret dhe që ne bëjmë më të mirën e mundshme për të gjetur përgjigjet që mund t’i ndihmojnë ata më shumë lidhur me pyetjet që kanë.

Si e mbani gjallë shkëmbimin me partnerët tuaj dhe me rrjetin social?
DL: Në fillim kjo gjë ishte një sfidë. Të gjithëve na u desh të mësoheshim fillimisht me teknologjitë e reja. Duke u bazuar në përvojën e fituar gjatë krizës së koronës ne planifikojmë të zgjerojmë ofertën dixhitale për kualifikim. Disa aktivitete për të cilat kemi marrë një feedback pozitiv do të vazhdojmë t’i ofrojmë online.
HD: Kemi dhe një ide të re: dëshirojmë të ofrojmë panaire virtuale për punësim, si alternativë kundrejt formateve tradicionale.

Njerëzit e dinë që ne bëjmë më të mirën e mundshme për të gjetur përgjigjet që mund t’i ndihmojnë ata më shumë lidhur me pyetjet që kanë.

„DIMAK-u është ndërkohë një emër i njohur“

Më shumë Përvojat

Punë e re dhe fillim i ri në Shqipëri

Panairet virtuale për punësim – një format me të ardhme

Fillesë në të ardhmen profesionale